Nr. 57 / 13. März 2017

25 Johr Biraat Nedderdüütsch bi den Sleswig-Holsteenschen Landdag
Den Biraat Nedderdüütsch bi den Sleswig-Holsteenschen Landdag gifft dat vundaag (Maandag) siet 25 Johr. „Dat Nedderdüütsche tekent uns Land siet vele Johrhunnerten ut un is dormit ok Grundlaag vun uns Kultur un Sellschop vundaag“, so see Landdagspräsident Klaus Schlie to dat Jubiläum.
In Artikel 13 Afsatz 2 vun de Landsverfaten steiht binnen: „Das Land schützt und fördert die Pflege der niederdeutschen Sprache“. Um düsse Opgaav kümmert sik de Biraat un füllt em mit Leven ut. „Dorför maakt sik de Biraat tosamen mit Ehrenamtlers, mit Vereene un Verbänne siet 25 Johren stark. Jüst de gellt uns Dank, denn vundaag hebbt Jung un Oolt för dat Nedderdüütsche veel över“, so meen de Parlamentspräsident. „Dorüm dat de Politik un de Spraakgemeen so eng tosamenarbeiden doot, is veel för de nedderdüütsche Spraak schafft worrn“, so Schlie. „Man dat blifft wiederhen uns Opgaav, de Spraak Stütt to geven, de Biraat blifft an’n Ball – denn de Wind weiht woll en Barg tohoop, aver keen dicken Hupen.“
Wat de Regionalspraak stark maakt hett, is to’n Bispeel dat Inrichten vun de beiden Zentren för Nedderdüütsch in de Landsdelen Sleswig un Holsteen – un denn ok noch de Landsplaan Nedderdüütsch. Dorto höört ok de Emmi-Pries, de all twee Johr utgeven warrt. De Pries geiht an Lüüd, de sik mit soziale un kulturelle Projekten rundüm Platt bewarvt oder de in’t Ehrenamt ehr Verdeensten för de Spraak wiesen köönt. Denn kümmert sik de Biraat, wat Plattdüütsch ok in de Medien düchtig opdükert deit. So gifft dat all twee Johr tosamen mit den NDR den „Poetry Slam op Platt“ in’t Landshuus. Ümmer op den Zeddel hett de Biraat den Ünnerricht op Nedderdüütsch in de Scholen in’t Land – un wat ok de Europäische Charta vun de Regional- oder Minnerheitenspraken ümsett warrt.


Wat steiht dor achter: De allereerste Sitten, wo allens fastmaakt worr, weer an’n 13. März 1992 in’t Landshuus, um „die Beziehung Plattdeutsch – Politik zu institutionalisieren und sich gemeinsam für Erhalt und Pflege des Niederdeutschen zu engagieren“. So worr domals seggt. Landdagspräsidentin Lianne-Paulina Mürl harr de Idee un sett ehr ok üm. Lüüd ut de Landdags- 2

Frakschonen, de Minnerheiten-Beopdragte vun de Landsregeren, welk ut de Ministerien un Lüüd vun de Sprekergrupp kemen tosamen. Sietdem gifft dat twee Sittens in’t Johr, wo een sik uttuuscht över dat Nedderdüütsche, de Politik snackt mit de Sprekers. Den Vörsitt hett de Landdagspräsident. Wenn en niege Legislaturperiood anfangt, kümmt de Biraat wedder frisch in de Gang.